傳媒報導媒體報導

【八方相當年】「細孖」工黨主席郭永健 中四已經反威權

呢期政壇有位後起之秀幾受人注目,民主黨香港眾志民協等政黨都撐佢喺新東3.11補選代為披甲,似乎凝聚力非凡,事實上31歲嘅郭永健啱啱亦當選工黨主席,係泛民主流政黨嘅最年輕話事人,協助帶領市民對抗威權。原來佢喺中學時代已經有抗爭史,「中四時候quit咗prefect,因為個訓導老師好專制,忍唔到佢成日呼喝啲同學。」

唔少人都知,郭永健有個大佢約10分鐘嘅孖生哥哥,人稱「細孖」嘅佢話,連媽媽都話最初分唔清佢哋兩兄弟,「試過餵完阿哥食奶,又再餵佢」,返學都會被認錯,但其後自己面上多咗粒癦,啲人開始識分大同細。

參加緊泛民新東初選嘅佢自細喺馬鞍山大,「幾乎去勻馬鞍山所有籃球場打波」,呢位新東之友中學讀沙田浸信會呂明才中學,雖然同阿哥唔同校,但會考竟然都係同分,各有高達28分,明顯都係高材生,但細孖話佢讀書算係好輕鬆,可能係平時溫得夠,自爆考試前一晚通常「樁眼瞓」,「溫到10點幾就瞓覺,翌日考試反而精神好夠」。

雖然佢係理科生,卻熱愛中國歷史,「小六時試過攞家姐中三本中史教科書嚟睇」,《資治通鑑》佢都由頭睇到尾,「確實係有啲冷門」。中學畢業後入咗港大讀建築,卻發現建築原來好重美學,「頭一年都係畫畫同人體掃描等,同預期有啲落差,咁啱又開始諗緊點樣可以回饋下社會、砌圖畫則又有乜作用?」

結果讀唔夠一年就轉至經濟及金融系,「讀經濟反而可以更了解社會」,當時副修政治兼有讀哲學嘅佢更因此確立咗左翼立場,之後創立過「左翼21」組織!2010年仲同周澄等人組成「大專2012」並參與五區公投,出戰過新界西補選;若然有幸回歸成長地參加新東補選,唔知會唔會成功出線?

唔好問八方,邊個係細孖郭永健……(受訪者提供相片) 大細孖真係好難分……(受訪者提供相片)
郭永健係馬鞍山之友,就讀沙田呂明才中學。(受訪者提供相片) 大學時代已經參加好多社會運動。(受訪者提供相片) 大學時代已經參加好多社會運動。(受訪者提供相片)
曾任港大學生會會長嘅郭永健喺開學禮致辭。(受訪者提供相片) 2010參加過五區公投,出戰新西。(受訪者提供相片) 2010參加過五區公投,出戰新西。(受訪者提供相片)
守衞皇后碼頭時瞓過街。(受訪者提供相片) 佔領過中環交易廣場平台。(受訪者提供相片) 2014年結婚嘅郭永健,有個1歲11個月大嘅囡囡,以及一隻愛犬。(受訪者提供相片)
去年立法會選舉與張超雄合組名單喺新東出征。(受訪者提供圖片)

資料來源:
https://hk.news.appledaily.com/local/realtime/article/20171218/57592197